"Mabilioni" ya Kikwete bado hayajarejeshwa

FEDHA zilizotolewa na serikali kwa ajili ya kuwezesha wananchi kiuchumi maarufu kama mabilioni ya Kikwete, imeelezwa sehemu hazikutumika huku nyingine zilizokopwa hadi sasa hazijarejeshwa.

 

Waziri wa Nchi, Ofisi ya Rais, Uwekezaji na Uwezeshaji, Christopher Chiza alitoa taarifa hiyo jana bungeni wakati akijibu swali la nyongeza la Mbunge wa Viti Maalumu, Maryam Salumu Msabaha (Chadema).

 

Mbunge huyo alisema mikopo iliyotolewa kwa fedha hizo ambazo kwa upande wa Zanzibar zilijulikana kama mabilioni ya Karume na kwa Tanzania Bara mabilioni ya Kikwete, watu hawakurejesha.

 

 

Hivyo alitaka kufahamu ni hatua gani serikali inachukua kwa watu hao. Chiza alisema Zanzibar walipata Sh milioni 600 na serikali yao ikaongeza Sh m i l i o n i 600 na kufanya jumla yote kuwa Sh b i l i o n i 1.2.

 

Hata h i v y o , a l i s e m a k w a pande zote, Zanzibar na Tanzania Bara, kulikuwa na changamoto zilizojitokeza. “Zipo fedha ambazo hazijatumika….Mkaguzi mkuu wa ndani amefanya ukaguzi wa fedha zote,” alisema Chiza na kuongeza kuwa taarifa ya mkaguzi, itaeleza ni nani alipata mkopo wa fedha hizo na ni nani hakurejesha kwa ajili ya kuchukua hatua stahiki.

 

Awali katika swali la msingi, Mbunge wa Viti Maalumu, Faida Mohamed Bakari (CCM) alitaka kufahamu ni wafanyabiashara wangapi wenye ulemavu walipatiwa mikopo kupitia fedha hizo.

 

Waziri Chiza alisema mpango huo wa kuwezesha wananchi kiuchumi, ulikuwa na madhumuni ya kuwezesha wananchi kiuchumi na kuongeza ajira kwa wanawake na vijana vijijini na mijini kwa kuwapatia mikopo bila kujali maumbile yao.

 

Alisema chini ya mpango huo, mikopo ilitolewa katika awamu mbili kupitia benki na asasi za kifedha, zilizoteuliwa na serikali baada ya kukidhi vigezo ambapo jumla ya Sh bilioni 43.69 zilitolewa na kunufaisha wajasiriamali 74,593.

 

Kwa upande wa Tanzania Bara, wananchi waliohitaji mikopo hiyo walitakiwa kujaza fomu ambazo hazikuwa na kipengele kinachoainisha iwapo mwombaji ni mtu mwenye ulemavu au siyo.

 

Waziri alisema kutokana na utaratibu huo, imekuwa vigumu kutoa takwimu za watu wenye ulemavu waliopata mkopo, aina ya ulemavu walio nao na sehemu wanakotoka pamoja na aina ya biashara wanazofanya kama alivyotaka mbunge.

 

Hata hivyo, alimshukuru Mbunge Faida na kusema serikali imepokea swali lake kama changamoto ya kufanyia kazi, ambayo itachochea kubuni upya utaratibu wa utoaji mikopo hiyo kwa kuzingatia vigezo vya ziada kwa watu na makundi maalumu wakiwemo wenye ulemavu wa viungo.